గచ్చిబౌలి భవనం ఘటనపై సంచలన ఆరోపణలు

గచ్చిబౌలి అంజయ్యనగర్‌లో భవనం కూలిన ఘటన నేపథ్యంలో బిల్డర్‌ సాజిద్‌ ఖాన్‌ నిర్మాణాల వ్యవహారం మరోసారి చర్చనీయాంశంగా మారింది. సాజిద్‌ చేపట్టిన పలు నిర్మాణాల్లో నిబంధనల ఉల్లంఘనలు ఉన్నట్లు అధికారులు గుర్తించినట్లు సమాచారం. చిన్న స్థలాల్లోనే అధిక అంతస్తులు నిర్మించి వాటిని హాస్టళ్లుగా వినియోగించినట్లు ఆరోపణలు ఉన్నాయి.చిన్న మెకానిక్‌గా తన ప్రస్థానం ప్రారంభించిన సాజిద్‌.. అనంతరం నిర్మాణ రంగంలోకి ప్రవేశించి భారీగా ఆస్తులు కూడబెట్టినట్లు స్థానికంగా చర్చ జరుగుతోంది. సైబరాబాద్‌ పరిధిలో ఆయనకు సంబంధించిన పలు నిర్మాణాలపై ఫిర్యాదులు వచ్చినట్లు హైడ్రా అధికారులు పేర్కొంటున్నారు.అంజయ్యనగర్‌ ఘటన తర్వాత సాజిద్‌కు సంబంధించిన ఇతర నిర్మాణాలపైనా అధికారులు దృష్టి సారించారు. నిబంధనలకు విరుద్ధంగా నిర్మించిన భవనాలు, అనుమతుల వివరాలు, నిర్మాణాలకు సంబంధించిన పత్రాలను పరిశీలించే పనిలో అధికారులు ఉన్నారు.అక్రమ నిర్మాణాలకు కొందరు టౌన్‌ ప్లానింగ్‌ అధికారులు సహకరించారనే ఆరోపణలు కూడా తెరపైకి వచ్చాయి. ఈ వ్యవహారంలో అధికారుల పాత్రపై కూడా విచారణ జరిపే అవకాశం ఉన్నట్లు తెలుస్తోంది. సాజిద్‌ నిర్మించిన కట్టడాలపై హైడ్రా ప్రత్యేకంగా దృష్టి పెట్టడంతో మరిన్ని వివరాలు వెలుగులోకి వచ్చే అవకాశం ఉంది.