పోలీసులపై దౌర్జన్యమా? కేటీఆర్ తీరుపై తీవ్ర విమర్శలు

హైదరాబాద్: బీఆర్ఎస్ వర్కింగ్ ప్రెసిడెంట్ కేటీఆర్ తీరుపై అధికార పక్షానికి చెందిన నేతలు తీవ్ర విమర్శలు చేశారు. పోలీసు అధికారులు, ప్రజాప్రతినిధులు, పార్టీ నాయకులు, కార్యకర్తలు, మీడియా సమక్షంలో పోలీసులతో జరిగిన వాగ్వాదం, దురుసు ప్రవర్తనపై వారు అభ్యంతరం వ్యక్తం చేశారు.విధులు నిర్వర్తిస్తున్న పోలీసు అధికారిపై దౌర్జన్యం చేయడం, దుర్భాషలాడటం, కాలర్ పట్టుకుని దాడికి ప్రయత్నించడం వంటి ఘటనలు కెమెరాల్లో రికార్డయ్యాయని విమర్శకులు పేర్కొన్నారు. ఈ ఘటనలను కొన్ని మీడియా సంస్థలు, సోషల్ మీడియా వేదికలు వెలుగులోకి తీసుకొచ్చాయని తెలిపారు.పోలీసులతో జరిగిన ఘర్షణ అనంతరం తమకే గాయాలయ్యాయని చెబుతూ మీడియా ముందు ప్రదర్శించడం కూడా విమర్శలకు దారితీసిందని వారు ఆరోపించారు. ఈ వ్యవహారాన్ని రాజకీయ డ్రామాగా అభివర్ణిస్తూ కేటీఆర్‌పై విమర్శలు గుప్పించారు.అదేవిధంగా ఎమ్మెల్సీ నవీన్ పోలీసు అధికారితో దురుసుగా ప్రవర్తించారని, పోలీసు కాలర్ పట్టుకున్నారనే ఆరోపణలు కూడా చేశారు. మరోవైపు ఎమ్మెల్సీ తాత మధు స్పీకర్‌ను అవమానకరమైన పదజాలంతో సంబోధించారని విమర్శించారు.

“ఇవన్నీ ఎవరో కల్పించిన కథలు కావు.. కెమెరాల్లో రికార్డైన వాస్తవాలు” అని అధికార పక్షం నేతలు పేర్కొన్నారు. అయినప్పటికీ కేటీఆర్ ప్రభుత్వాన్నే నిందించడం బాధ్యతారహిత వైఖరికి నిదర్శనమని విమర్శించారు.స్పీకర్‌ను అవమానించిన పార్టీ నేతలను సమర్థించడం బీఆర్ఎస్ రాజకీయ సంస్కృతిని ప్రతిబింబిస్తోందని ఆరోపించారు. ప్రజలు ఇప్పటికే ఆ పార్టీ రాజకీయాలను తిరస్కరించారని, గత అనుభవాల నుంచి పాఠాలు నేర్చుకోకుండా అదే ధోరణిని కొనసాగిస్తే భవిష్యత్తులో ప్రజల నుంచి మరింత తీవ్ర వ్యతిరేకత ఎదుర్కోవాల్సి వస్తుందని హెచ్చరించారు.