ASR Telugu , హైదరాబాద్, సెప్టెంబర్ 14: హిందూ సాంప్రదాయాల్లో తొలి పూజ గణనాథుడికే జరుగుతుందని మాజీ మంత్రి, బీఆర్‌ఎస్ పార్టీ డిప్యూటీ ఫ్లోర్ లీడర్ తలసాని శ్రీనివాస్ యాదవ్ అన్నారు. వినాయక చవితి సందర్భంగా హైదరాబాద్ ఖైరతాబాద్‌లోని పంచముఖ సంకట హర మహా గణపతిని ఆయన దర్శించుకుని ప్రత్యేక పూజలు నిర్వహించారు.
పూజల అనంతరం ఎమ్మెల్యే దానం నాగేందర్ తలసాని శ్రీనివాస్ యాదవ్‌ను సన్మానించి గణపతి జ్ఞాపికను అందజేశారు.
Also Read
ఖైరతాబాద్ గణపతికి ప్రపంచంలోనే అతిపెద్ద వినాయకుడిగా గుర్తింపు ఉందని తలసాని శ్రీనివాస్ యాదవ్ తెలిపారు. గత 69 సంవత్సరాలుగా ఖైరతాబాద్‌లో గణపతి నవరాత్రి ఉత్సవాలను ఘనంగా నిర్వహిస్తున్నారని పేర్కొన్నారు.
అతిపెద్ద ఖైరతాబాద్ గణపతిని దర్శించుకునేందుకు హైదరాబాద్‌తో పాటు రాష్ట్రంలోని వివిధ ప్రాంతాల నుంచి లక్షలాది మంది భక్తులు తరలివస్తారని అన్నారు.
వినాయకుడి దర్శనానికి వచ్చే భక్తులకు ఎలాంటి అసౌకర్యం కలగకుండా అన్ని ఏర్పాట్లు చేసిన ఉత్సవ కమిటీ సభ్యులకు తలసాని శ్రీనివాస్ యాదవ్ శుభాకాంక్షలు తెలిపారు.
గణనాథుడి ఆశీస్సులతో ప్రజలందరూ సుఖసంతోషాలతో, ఆయురారోగ్యాలతో ఉండాలని ఆకాంక్షించారు. ప్రజలందరిపై ఆ గణనాథుడి చల్లని దీవెనలు, ఆశీస్సులు ఉండాలని ప్రార్థించారు.
వినాయక చవితి అంటే తొమ్మిది రోజుల పాటు హైదరాబాద్ నగరంలోని ప్రతి గల్లీ గణపతి పూజలు, భక్తి కార్యక్రమాలతో సందడిగా మారుతుందని తలసాని శ్రీనివాస్ యాదవ్ అన్నారు.
ప్రజలు భక్తిశ్రద్ధలతో గణనాథుడిని పూజిస్తూ ఉత్సవాలను ఆనందంగా జరుపుకోవాలని ఆయన ఆకాంక్షించారు.
