ఖమ్మంలో జనసేన కీలక సమావేశం.. తెలంగాణలో పార్టీ బలోపేతంపై చర్చ

ఖమ్మంలో జనసేన పార్టీ ముఖ్య నాయకుల సమావేశం నిర్వహించారు. తెలంగాణలో పార్టీని సంస్థాగతంగా బలోపేతం చేయడం, రాబోయే స్థానిక సంస్థల ఎన్నికల్లో పార్టీ పాత్రను విస్తరించడం వంటి అంశాలపై సమావేశంలో కీలకంగా చర్చించారు.ఈ సందర్భంగా జనసేన రాష్ట్ర ప్రధాన కార్యదర్శి తాళ్లూరి రామ్ మాట్లాడుతూ.. తెలంగాణలో పార్టీని క్షేత్రస్థాయి నుంచి బలోపేతం చేయడమే ప్రధాన లక్ష్యమన్నారు. రాబోయే జడ్పీటీసీ, ఎంపీటీసీ ఎన్నికలపై జనసేన ప్రత్యేక దృష్టి సారిస్తుందని తెలిపారు. ఖమ్మం మేయర్ ఎన్నికలో జనసేన మద్దతు కీలకంగా మారిందని పేర్కొన్నారు.అలాగే రాబోయే గ్రాడ్యుయేట్ ఎమ్మెల్సీ ఎన్నికల్లో గడల శ్రీనివాసరావును అభ్యర్థిగా బరిలోకి దింపే అంశాన్ని వెల్లడించారు.గడల శ్రీనివాసరావు మాట్లాడుతూ.. ఉమ్మడి ఖమ్మం జిల్లాలో ఆశించిన స్థాయిలో అభివృద్ధి జరగడం లేదని విమర్శించారు. జిల్లాకు ముగ్గురు మంత్రులు ఉన్నప్పటికీ అభివృద్ధి విషయంలో ప్రజలకు నిరాశే మిగిలిందని ఆరోపించారు. ప్రజా సమస్యలపై జనసేన నిరంతరం పోరాడుతుందని తెలిపారు.తెలంగాణలో పార్టీకి బలమైన క్యాడర్‌ను నిర్మించి, ప్రజా సమస్యల పరిష్కారంలో కీలక పాత్ర పోషించే దిశగా ముందుకు సాగాలని సమావేశంలో నిర్ణయించినట్లు నాయకులు తెలిపారు.