బోడుప్పల్‌లో 22A వివాదం.. 1,500 కుటుంబాల ఆందోళన

# బోడుప్పల్‌లో 22A వివాదం.. 1,500 కుటుంబాల ఆందోళనబోడుప్పల్ పరిధిలోని తిరుమల మెడోస్, లక్ష్మీ గణపతి కాలనీ, హేమానగర్ కాలనీలకు చెందిన పలువురు స్థానికులు 22A నిషేధిత జాబితా సమస్యపై ఆందోళన వ్యక్తం చేస్తున్నారు. సర్వే నంబర్ 215, 215 పార్ట్‌లలో దశాబ్దాలుగా నివాసం ఉంటున్న సుమారు 1,500 కుటుంబాల ఇళ్లను అర్బన్ ల్యాండ్ సీలింగ్ పరిధిలోకి తీసుకురావడంపై వారు అభ్యంతరం వ్యక్తం చేస్తున్నారు.ఇళ్లకు సంబంధించిన రిజిస్ట్రేషన్లు పూర్తయినప్పటికీ ప్రస్తుతం ఆస్తులు నిషేధిత జాబితాలో ఉన్నట్లు తెలుస్తుండటంతో, అవసరమైన సమయంలో ఆస్తులను విక్రయించలేక ఇబ్బందులు ఎదుర్కొంటున్నామని కాలనీ వాసులు చెబుతున్నారు. ఈ పరిణామం తమను ఆర్థికంగా, మానసికంగా తీవ్ర ఇబ్బందులకు గురిచేస్తోందని ఆవేదన వ్యక్తం చేస్తున్నారు.ఈ సమస్యపై స్పందించిన బీఆర్ఎస్ నేతలు.. ప్రజల ఆస్తులపై ఏర్పడిన 22A సమస్యను ప్రభుత్వం వెంటనే పరిష్కరించాలని డిమాండ్ చేశారు. నిషేధిత జాబితాలో చేర్చిన భూములపై పూర్తి స్థాయిలో విచారణ జరిపి, అర్హత ఉన్న ఆస్తులను జాబితా నుంచి తొలగించాలని కోరారు.దశాబ్దాలుగా నివసిస్తున్న కుటుంబాలకు స్పష్టత కల్పించడంతో పాటు, వారి ఆస్తి హక్కులకు భంగం కలగకుండా ప్రభుత్వం చర్యలు తీసుకోవాలని డిమాండ్ చేశారు. సమస్య పరిష్కారం కాకపోతే బాధితుల తరఫున పెద్ద ఎత్తున ఉద్యమం చేపడతామని బీఆర్ఎస్ నాయకులు హెచ్చరించారు.