ర‌వితేజ‌కు పుత్రికోత్సాహం.. ఇంట్లో సంబరాలు

సినీ కుటుంబాల నుంచి వారసులు హీరోలుగా పరిచయం కావడం సాధారణమే. అయితే కుమార్తెలు నటనలోకి రాకుండా సినిమాకు సంబంధించిన ఇతర విభాగాల్లో తమకంటూ గుర్తింపు తెచ్చుకోవడం ఇప్పుడు కనిపిస్తోంది. మాస్ మహారాజా రవితేజ కుమార్తె మోక్షద కూడా ఇదే దారిలో అడుగులు వేస్తున్నట్లు తెలుస్తోంది.రవితేజ కుమారుడు మహాధన్ ఇప్పటికే ‘రాజా ది గ్రేట్’తో బాలనటుడిగా ప్రేక్షకులకు పరిచయమయ్యాడు. ప్రస్తుతం దర్శకత్వ విభాగంలో పనిచేస్తున్నట్లు సమాచారం. మరోవైపు మోక్షద మాత్రం తెరపై కనిపించకుండా సినిమా నిర్మాణంలో తనదైన పాత్ర పోషిస్తోంది.రవితేజ నటించిన తాజా చిత్రం ‘ఇరుముడి’కి మోక్షద ఎగ్జిక్యూటివ్ ప్రొడ్యూసర్‌గా వ్యవహరించినట్లు సమాచారం. కథ ఎంపిక నుంచి సినిమా మేకింగ్ వరకు ఆమె తన తండ్రికి సహకరించినట్లు తెలుస్తోంది. సాధారణంగా మీడియాకు దూరంగా ఉండే మోక్షద.. సినిమా విడుదల సందర్భంగా తన సోదరుడు మహాధన్‌తో కలిసి థియేటర్‌లో కనిపించింది.‘ఇరుముడి’కు ప్రేక్షకుల నుంచి మంచి స్పందన లభించడంతో రవితేజ కుటుంబంలో ఆనందం నెలకొంది. మోక్షదకు ఇదే తొలి కీలక సినిమా అనుభవంగా భావిస్తున్నారు. భవిష్యత్తులో ఆమె నిర్మాతగా మారి మరిన్ని చిత్రాల్లో భాగస్వామి అవుతుందా అనే ఆసక్తి అభిమానుల్లో నెలకొంది.