చక్కెర ధరలకు షాక్‌.. కేజీ రూ.70 వరకు!

సామాన్యులపై నిత్యావసర ధరల భారం మరోసారి పెరిగింది. తాజాగా చక్కెర ధరలు గణనీయంగా పెరిగాయి. దేశంలోని పలు రిటైల్‌ మార్కెట్లలో కేజీ చక్కెర ధర రూ.60 దాటగా.. కొన్ని ప్రాంతాల్లో ఏకంగా రూ.70 వరకు పలుకుతోంది.మార్కెట్‌లో ప్రస్తుతం కేజీ చక్కెర సగటు ధర సుమారు రూ.63గా ఉన్నట్లు సమాచారం. ప్రాంతాన్ని బట్టి ధరల్లో వ్యత్యాసం కనిపిస్తోంది. గతంతో పోలిస్తే చక్కెర ధరలు పెరగడంతో వినియోగదారులపై అదనపు భారం పడుతోంది.చక్కెర ధరల పెరుగుదలకు దేశీయ ఉత్పత్తిలో మార్పులు, చెరకు పంటపై వాతావరణ ప్రభావం, మార్కెట్‌లో డిమాండ్‌ పెరగడం వంటి అంశాలు ప్రధాన కారణాలుగా చెబుతున్నారు. అంతర్జాతీయ మార్కెట్‌లో సరఫరా పరిస్థితులు కూడా దేశీయ ధరలపై ప్రభావం చూపుతున్నాయి.మరోవైపు కొందరు వ్యాపారులు అధిక మొత్తంలో నిల్వలు ఉంచడం వల్ల మార్కెట్‌లో కృత్రిమ కొరత ఏర్పడే అవకాశం ఉందని అధికారులు భావిస్తున్నారు. దీంతో నిల్వలపై కేంద్ర ప్రభుత్వం నిఘా పెంచింది. వ్యాపారులు నిర్ణీత పరిమితికి మించి స్టాక్‌ ఉంచకుండా చర్యలు తీసుకుంటోంది.దేశంలో చక్కెర నిల్వలు అందుబాటులో ఉన్నాయని, సరఫరాకు ఎలాంటి పెద్ద సమస్య లేదని పరిశ్రమ వర్గాలు చెబుతున్నాయి. మార్కెట్‌లోకి సరఫరా పెరిగితే రానున్న రోజుల్లో ధరలు కొంత తగ్గే అవకాశం ఉందని అంచనా వేస్తున్నారు.